شنو هو الـ Net Profit؟

النت بروفت، أو صافي الربح، هو الفلوس اللي تبقى بعد ما ندفع كل المصاريف (كلشي) من إيجارات، إلى رواتب، إلى مواد، إلى صيانة، إلى أقساط، وحتى مصاريف بسيطة مثل الچاي ، الكهرباء، التسويق، الهدايا، وحتى الگاز مال المولدة . بس المشكلة مو هنا. المشكلة إنو أغلب الدكاترة يخلطون بين الكاش اللي باقي… وبين صافي الربح. ليش؟ لأن بمجالنا ماكو ديون على الزبائن، ماكو حسابات آجلة، فالإيراد = الكاش. فيحسب اللي يبقى من الكاش… ويروح ياخذه بس هذا مو صافي ربح، هذا بس كاش باقي بالجرار. وين الغلط يصير بالضبط؟ اللي يصير فعليًا الدكتور يشتغل كل الشهر و بنهاية الشهر يشوف أكو فلوس بالجرار ياخذها كلها، يحطها بجيبه، ويگول “هذا ربح العيادة”. بس هو ما حاسب: راتب لنفسه كطبيب، الديون المؤجلة أو حساب مختبرات، استهلاك الأجهزة، او الفلوس المطلوبة لدفعة إيجار. بعد شهرين أو ثلاثة، يكتشف إنو العيادة مديونة، بس هو طول هالوقت چان ياخذ “الربح” ويحس نفسه "ربحان". وهو بالحقيقة كان يسحب من رأس المال أو من ديون ما دافعها بعده

شلون نحسبه صح؟

أول خطوة لازم يسويها أي طبيب:

يتعامل ويا نفسه كموظف، يعني يحسب لنفسه راتب شهري ثابت، مثل أي طبيب ثاني

بعدين يحسب كل المصاريف الحقيقية:

والمتغيرة مثل المواد، الصيانة، التسويق، نسب الاطباء، الخ. بعدها، الرقم اللي يبقى بعد كل هذا، هو “صافي الربح” أو الـ Net Profit الحقيقي. مو اللي تحسه، ولا اللي تشوفه بالجرار، بس اللي يطلع على الورقة ورا ما تنحسب كل الأرقام. المفهوم اللي راح يصدمك راح تحس إنو الرقم أقل مما توقعت، و يمكن تكتشف إنو العيادة أصلاً ما تطلع أرباح حقيقية، بس لأن انت چنت تشتغل بدون راتب، وتسحب كاش كل ما يزيد.

إذا ما عندك Net Profit… أنت بس تشتغل

العيادة بزنس، والبزنس لازم يقاس بلغة الأرقام، مو بالإحساس، إذا ما عندك رقم واضح تقول بيه: "هاي الفلوس بقت بعد ما دفعنا كلشي” فأنت "بس تشتغل".

ابدي من هسه، سجّل إيراداتك، مصاريفك، ديونك، وراتبك أنت، واحسب صافي الربح الحقيقي. لأن البزنس الحقيقي هو اللي يخليك ترتاح… مو بس تتعب.