1. اعمال الصيانة والتصليح

من تقل السيولة النقدية الناس تميل للتصليح بدل شراء الجديد. بعد السقوط ومن تحسن الوضع المادي للمجتمع ومع سهولة الاستيراد من الصين صار تغيير تدريجي باتجاه الاستبدال بدل الصيانة والتصليح، وحتى المصلحين صاروا ما يصلحون وانما يبدلون. قبل كان اكو لف ماطورات هسه كبل تصليح ، من باب ما تسوه. لان قيمة الجهد البشري المبذول بالصيانة رح يكون مقارب او حتى اعلى من سعر قطع الغيار المستوردة خصوصا الاقتصادي واطئ الكلفة منها.

بس بالازمات الاقتصادية يميل الناس للادخار وتقليل الانفاق على شراء السلع الجديدة ويميلون لتقبل الصيانة والتصليح بشكل اكبر.

امثلة: تصليح الاجهزة الكهربائية والالكترونية والسيارات وماطورات الماي وعدنا بالمجال الطبي صيانة الاجهزة الطبية مثل كرسي الاسنان وباقي الاجهزة ايل يستعملها الطبيب.

2. المستعمل: البالة \السكند هاند\اعادة البيع

الناس ممكن تحتاج تبيع أغراض لتأمين السيولة وناس ثانية تميل الى شراء حاجات مستعملة بدل الجديدة لتقليل كلفة الشراء فتزدهر تجارة المستعمل.

السيارات: يقل شراء الجديد من الوكالات ويصير صعب تسويقها الا بالاقساط الميسرة.

الالكترونيات والاجهزة المنزلية: حاليا كلها تشتري جديد بس ممكن بعدين يصير سوق موازي للمستعمل.

وطبعا هسه صار فترة اكو سوق نشط للبالة المستوردة من اوربا وامريكا... بس حجينا هنا عن النشاط الاقتصادي الداخلي بعد رفع الضريبة والكمرك فيصعب الاستيراد ويزيد النشاط الداخلي الاقتصادي.

3. التعليم والتطوير العملي المهني

اثناء الازمات يتغير وجه السوق ويصير انقلاب بالحاجة للمهن خصوصا المبنية على المهارات. مثال فوق سولفنا عن اهمية الصيانة والتصليح .. فممكن تزدهر كورسات تعليم الصيانة والتصليح بسبب ارتفاع الطلب.

ومن يختنق السوق ويصير صعب... حتى صاحب الخبرة يحتاج يتعلم اكثر لان المعرفة ايل عنده صارت مو كافية حتى يجاري الضغط التنافسي. ونفس الشي بالخدمات النفسية التحفيزية بسبب كثرة الضغط بالعمل والحياة فتزيد الحاجة للمحتوى الملهم والخدمات التدريبية الشخصية.

4. الخدمات الصغيرة منخفضة رأس المال

وكتها الوظائف التقليدية تصير ما تكفي فيتوجه الناس لفتح اعمال صغيرة من البيت وكل واحد يشتغل بلي يعرفه مثل ربة بيت تسوي طبيخ، معلمة تدرس خصوصي، صفحات انستا تبيع ملابس، صح هسه موجودة .. بس تزيد.

نشاطات ما رح تتأثر هواي:

1. المواد الاستهلاكية الضرورية

هاي ما توقف لان استخدامها اساسي يقل سوق السلع الفاخرة بس ترجع الحاجة للأساسيات.

2. مواد التجميل وكماليات الترفيه

ممكن تزيد السحب عليها اصلا .. اكو نظرية اسمها نظرية قلم الحمرة، سووا دراسة عن الازمة الاقتصادية ب٢٠٠٨ وشافوا زيادة بمبيعات اقلام الحمرة ومساحيق التجميل اثناء الازمات لان يميل البشر الى الالهاء واقناع نفسه بالامكانية المادية الوهمية عن طريق الانفاق على الامور الكمالية وقت الرخاء الناس تشتري الطموح والمكانة والراحة، وقت الازمات الناس تريد حلول.