00
أولاً: وين نحسب استهلاك الأجهزة (Depreciation)؟
الاستهلاك مفهوم بسيط لكنه خطير إذا ما انحسب صح. الجهاز اللي اشتريته بـ 10 ملايين دينار ما تعتبره مصروف شهري، لأنك فعليًا راح تستخدمه لسنوات.
إذا فرضنا عمر الجهاز 3 سنوات، فالمفروض تسجل 3.3 مليون مصروف استهلاك سنوي.
ليش هذا مهم؟ حتى تكون أرباحك حقيقية، مو رقم خادع. اللي ما يحسب الاستهلاك، راح يبين كأنه يربح أكثر مما هو فعلاً، لكن بعد سنتين لما يخرب الجهاز، يضطر يشتري جديد من الصفر — وغالبًا بالدَين. الاستهلاك مو رقم محاسبي ممل، هو ضمان لاستمرارية مشروعك.
01
ثانياً: شنو نقصد بـ نقطة التعادل (Break-even Point)؟
نقطة التعادل هي اللحظة اللي يغطي بيها دخل العيادة كل مصاريفها — بدون ربح ولا خسارة. كل دينار يدخل بعد هاي النقطة هو ربح فعلي.
لكن الخطأ الشائع إن الطبيب يعتقد إن مجرد تغطية التكاليف كافية. الربح الحقيقي يبدأ بعد ما تغطي:
- التكاليف الثابتة (مثل الإيجار والرواتب)
- التكاليف المتغيرة (مثل المواد)
- استهلاك الأجهزة (Depreciation)
- راتبك كطبيب
إذا نسيت واحد من هاي العناصر، فالأرقام عندك مو دقيقة. معرفة نقطة التعادل هي الخطوة الأولى لفهم أرباحك الحقيقية.
02
ثالثاً: هل السحب الشخصي الشهري يهدد رأس المال؟
كثير من الأطباء يسوون خطأ بسيط لكنه مكلف: يسحب كل الفلوس بنهاية الشهر ويگول “هاي أرباحي”.
لازم نفرّق بين ثلاث أنواع من الفلوس:
- راتبك الشهري كطبيب – هذا مصروف تشغيلي عادي.
- الأرباح الفعلية – المبلغ اللي يبقى بعد كل المصاريف.
- رأس المال التشغيلي – الفلوس اللي تبقى لتشغيل العيادة (شراء مواد، رواتب، صيانة...).
إذا كل مرة تسحب كل المبلغ، راح تواجه أزمة سيولة أول ما تحتاج تصرف بشكل طارئ. الحل بسيط:
حدد لنفسك راتب شهري ثابت أو نسبة من الإيراد، وخلّي الأرباح تتوزع كل 3 أشهر مثلاً. هيچ تضمن استقرار مالي وتشغيل سليم للعيادة.
03
رابعاً: شنو الفرق بين الـ Budget التشغيلية ويمته تصير Strategy؟
الـ Budget معناها التخطيط القريب للأشهر القادمة:
- شكد تتوقع يجي مراجع؟
- شنو الكلفة؟
- شنو تريد تشتري أو تطوّر؟
أما الـ Strategy فهي الخطوة الأبعد — الرؤية السنوية أو المستقبلية للمشروع. هنا تتحول من طبيب إلى “مالك مشروع” وتبدأ تسأل نفسك:
- أريد أفتح فرع جديد؟ أو أطور الموجود؟
- أضيف خدمات جديدة أو أركز على تخصص معين؟
- أشتغل على البراند الشخصي وأصير مرجع بمجالي؟
- أدخل شراكات أو أوسع الفريق؟
الميزانية تصير استراتيجية لما تبدي تخطط مو للشهر الجاي، بل للسنة القادمة وما بعدها. تسأل نفسك: وين أريد أوصل؟ وشنو لازم أبدأ بهاليوم حتى أوصل هناك؟
04
وأخيراً: الفرق بين الإيرادات والكاش
الإيرادات (Revenue) هي قيمة العلاجات اللي قدمتها.
أما الكاش (Cash-In) فهو الفلوس اللي فعلاً دخلت للعيادة.
مثلًا: عالجت مراجع بمليون دينار، استلمت منه 400 ألف دفعة أولى، والباقي لاحقًا. الإيرادات مليون، لكن الكاش الفعلي 400 ألف.
الإيرادات مليون، لكن الكاش الفعلي 400 ألف. بالعراق أغلب الدفع كاش، فالفارق ما يبين بسهولة، بس يبقى ضروري نفرق بيناتهم. لأن الإيرادات تعني النشاط، أما الكاش فهو السيولة اللي تخليك تستمر.
05
الخلاصة
إدارة العيادة مو بس طب، هي مشروع حقيقي يحتاج وعي مالي. من تفهم شلون تحسب الاستهلاك، وتحدد نقطة التعادل، وتنظم سحبك الشخصي، وتحوّل ميزانيتك إلى استراتيجية — وقتها تكون فعلاً فهمت اللعبة.
